Кыргыз Республикасынын Балдар укугу боюнча ыйгарым укуктуу өкүлү Асель Чынбаева Нарын облусунун Кочкор районунда 2026-жылдын 9-февралынан 12-февралына чейин балдарга карата зомбулуктун алдын алуу боюнча маалыматтык кербендин II этабынын башталышына катышты. 

Иш чара Кыргыз Республикасынын Балдар укугу боюнча ыйгарым укуктуу өкүлүнүн катчылыгы тарабынан БУУнун Балдардын укуктары боюнча комитетинин корутунду сунуштарын аткаруу боюнча иш-чаралар планынын алкагында, "Балдарды коргоо борбору" коомдук бирикмеси менен биргеликте өттү. 

Иш-чараларга жалпысынан 450гө жакын окуучу жана 280 ата-эне катышты. Маалыматтык кербендин жүрүшүндө "Балдардын коопсуздугу үчүн күч-аракеттерди бириктирели" деген темада маалыматтык-агартуу иш-чаралары уюштурулду, анын алкагында: 

• педагогдор, ата-энелер жана жергиликтүү бийлик органдарынын өкүлдөрү менен зомбулуктун алдын алуу жана жергиликтүү деңгээлде балдарды коргоо системасын чыңдоо маселелери боюнча жолугушуулар жана талкуулар өткөрүлдү; 

• позитивдүү ата-энелик боюнча практикалык сабактар уюштурулду; 

• балдар менен ата-эненин ортосундагы мамилени чыңдоого багытталган психологиялык консультациялар көрсөтүлдү.

Бекитилген планга ылайык, маалыматтык кербенди өткөрүү Чүй, Ысык-Көл жана Ош облустарында улантылат. 

Маалымат үчүн: маалыматтык кербендин I этабынын алкагында 12 жалпы билим берүүчү мектепте иш-чаралар өткөрүлдү, анын ичинде Ысык-Көл облусунда (Түп жана Жети-Өгүз райондору) – 6 мектеп, Чүй облусунда – 2 мектеп, Бишкек шаарында – 4 мектеп. Иш-чараларга 7–11-класстын 1300 окуучусу жана 620 ата-эне катышты.