Кыргыз Республикасынын Президентинин Администрациясынын Жетекчиси – Министрлер Кабинетинин Төрагасы Адылбек Касымалиевдин атына чет өлкөлөрдүн өкмөт башчыларынан келе жаткан Жаңы жылы менен куттуктоолор келип түштү.
 
 Беларусь Республикасынын Премьер-министри Александр Турчин Министрлер Кабинетинин башчысы Адылбек Касымалиевди жаңы жылдык майрамдар менен куттуктады. «Келе жаткан Жаңы жылыңыздар менен эң чын ыкластуу жана жылуу куттуктоолорумду кабыл алыңыз. Беларусь Республикасы менен Кыргыз Республикасынын ортосундагы мамилелер ачыктыктын жана ишенимдин жогорку деңгээли менен айырмаланып, эки тараптуу сооданы кеңейтүү жана ишкер байланыштарды чыңдоо үчүн ишенимдүү негиз болуп кызмат кылып жатканын канааттануу менен белгилейм. Келе жаткан жылы беларусь-кыргыз кызматташтыгы өнүгүп, жаңы өз ара пайдалуу долбоорлор менен толукталат деп ишенем. Сизге, урматтуу Адылбек Алешович, чын жүрөгүмдөн ден соолук, бакубатчылык жана гармония каалайм. 2026-жыл коюлган максаттарга жетүү үчүн жаңы горизонтторду ачсын», - деп айтылат куттуктоодо.
 
 Бириккен Араб Эмираттарынын вице-президенти, Премьер-министри, Дубайдын башкаруучусу Мохаммед бин Рашид Аль Мактум Министрлер Кабинетинин Төрагасын келе жаткан Жаңы жылы менен куттуктады. «Сизге эң чын ыкластуу куттуктоолорумду жана жакшы каалоолорумду билдирем, сизге чың ден соолук жана бакыт, ал эми достук мамиледеги кыргыз элине мындан аркы өнүгүү жана гүлдөп өнүгүү каалайм», - деп белгиленет телеграммада. 

Казакстан Республикасынын Премьер-министри Олжас Бектенов Министрлер Кабинетинин Төрагасын Жаңы жылдык майрамдар менен куттуктады.
 
 "Сиздерди Жаңы 2026-жылыңыздар менен чын дилимден куттуктайм! Өтүп жаткан жыл Казакстан менен Кыргызстандын ортосундагы достуктун жылы, мамилелердин жана конструктивдүү өнөктөштүктүн мындан ары да чыңдалышынын жылы, өз ара ишенимге негизделген элибиздин кызматташтыгынын жаңы этабы болду. Келе жаткан 2026-жылы ортодогу байланыштарыбыздын мындан ары да чыңдалышына жана натыйжалуу эки тараптуу өнөктөштүктүн жаңы динамикасы болооруна ишенеримди билдирем. Сизге бекем ден соолук, жооптуу ишиңизде ийгиликтерди, ал эми боордош Кыргызстан элине тынчтык жана бакыт каалайм! Жаңы жыл бакубатчылык, гүлдөп-өнүгүү жана көп мүмкүнчүлүктөрдү алып келсин!" – деп айтылат жолдомодо.

Корея Республикасынын Премьер-министри Ким Минсок Министрлер Кабинетинин Төрагасын Жаңы жылы менен куттуктады.
 
 “Биринчиден, эки тараптуу өзгөрүлбөгөн достук жана кызматташтык үчүн терең ыраазычылык билдирүүгө уруксат этиңиз. Корея Республикасы тынчтыкта жана жалпы гүлдөп өнүгүү жолунда Кыргыз Республикасы менен мындан да тыгыз кызматташууну чыдамсыздык менен күтөт. Жаңы жылда сизге бекем ден соолук жана бакыт каалайм, ал эми өлкөңүздүн жаркын жана гүлдөгөн келечегине ишенем", - деп айтылат куттуктоодо.

Кытай Эл Республикасынын Мамлекеттик кеңешинин Премьери Ли Цян Министрлер Кабинетинин Төрагасына Жаңы жылдык майрамдарга байланыштуу куттуктоо катын жөнөттү.

Өзбекстан Республикасынын Премьер-министри Абдулла Ариповдун Жаңы жыл майрамына карата куттуктоосу.
 
 "Сиздерди кирип келген Жаңы 2026-жылыңыздар менен чын дилимден куттуктайм! Сизге, Сиздин үй-бүлө мүчөлөрүңүзгө жана жакындарыңызга бекем ден соолук, үй-бүлөлүк бакубатчылык жана жаңы ийгиликтерди, ал эми бир тууган Кыргызстан элине тынчтык, туруктуулук жана ар дайым өнүгүүнү каалайм", - деп айтылат куттуктоодо.

Польша Республикасынын Премьер-министри Дональд Туск Жаңы жылыңыздар менен куттуктоо жолдоду. “Польша Республикасынын Өкмөтүнүн жана жеке өзүмдүн атымдан сизге жеке бакубатчылык жана мамлекеттик ишмердүүлүгүңүзгө мындан аркы ийгиликтерди каалайм. 2026-жыл дүйнөлүк чыр-чатактардын чечилишине алып келсин жана тынчтыктын доорун баштоого шарт түзсүн", - деп айтылат куттуктоодо. 

 Россия Федерациясынын Өкмөтүнүн Төрагасы Михаил Мишустин Министрлер кабинетинин башчысын келе жаткан Жаңы жылы менен куттуктады.
 
 "Сизди кирип келе жаткан 2026-Жаңы жылыңыз менен чын жүрөктөн куттуктайм! Өтүп бара жаткан жылда Россия менен Кыргызстандын ортосундагы достук, стратегиялык өнөктөштүк жана союздаштык принциптерине негизделген мамилелер динамикалуу өнүгүүнү улантты. Соода-экономикалык, илимий-техникалык жана маданий-гуманитардык тармактарда кызматташтык кеңейип, Евразия экономикалык биримдигинин, Көз карандысыз мамлекеттер шериктештигинин, Жамааттык коопсуздук келишими уюмунун жана Шанхай кызматташтык уюмунун алкагында интеграциялык өз ара аракеттенүү чыңдалды. Өкмөттүк линия боюнча активдүү ишмердүүлүк ар кандай тармактарда практикалык кызматташтыкты чыңдоого көмөктөшөт, жаңы биргелешкен долбоорлорду ишке киргизүү үчүн жагымдуу шарттарды түзөт деп ишенем. Бул Россия Федерациясынын жана Кыргыз Республикасынын узак мөөнөттүү кызыкчылыктарына толук жооп берет. Урматтуу Адылбек Алешович, сизге чын дилимден бекем ден соолук, бакыт, бакубат жашоо жана жооптуу ишиңизге жаңы ийгиликтерди каалайм, ал эми достук мамиледеги Кыргызстан элине тынчтык жана бакубатчылык каалайм», - деп айтылат куттуктоодо.

Тажикстан Республикасынын Премьер-министри Кохир Расулзода Адылбек Касымалиевди келе жаткан Жаңы жылы менен куттуктады. "Келе жаткан жыл жаркын окуяларга, кесиптик ийгиликтерге жана бардык пландардын ишке ашуусуна толсун. Биздин өлкөлөрдүн ортосундагы коңшулук байланыштар өз ара түшүнүшүү жана ишеним духунда өнүгүп жатканы кубандырат. Өкмөттөр аралык кызматташтыгыбыз келе жаткан жылы дагы кеңейип, чыңдала берет деп ишенем. Сизге чың ден соолук жана бакыт, ал эми боордош Кыргызстан элине бакубатчылык, тынчтык жана гүлдөп өнүгүүнү каалайм", - деп айтылат куттуктоодо.